Денеска, ТППЕ Берово, во соработка со Општина Берово, успешно реализираше показна вежба, со цел унапредување на подготвеноста на единицата и координација при интервенции во случај на пожар.
Вежбата имаше двојна цел – тренинг и усовршување на единицата, како и практично запознавање на вработените во општинската зграда, со процедурите за навремена и безбедна евакуација, како и правилна реакција во кризна состојба и основни техники на спасување.
Во рамки на активностите, беше симулирана ситуација на пожар, во административен објект, при што беше демонстрирано:
-правилна дојава и координација со службите за итна интервенција,
-организирана и безбедна евакуација на присутните лица,
-пребарување и спасување на евентуално загрозени лица,
-гаснење на пожар во почетна фаза со преносни противпожарни апарати.
Посебен акцент беше ставен на практичната обука за употреба на противпожарни апарати, тип C9 (прашков апарат) и CO₂ апарати, при што вработените имаа можност да се запознаат со:
✔️ правилен начин на активирање,
✔️ избор на соодветен апарат во зависност од видот на пожарот,
✔️ безбедна дистанца и насочување на млазот кон жариштето,
✔️ мерки на претпазливост при ракување со CO₂ апарат, во затворен простор.
Со ваквите активности, се зајакнува свеста за важноста на превенцијата, навремената реакција и правилната примена на расположливата опрема, со што значително се намалуваат ризиците по животот и материјалните добра.
ТППЕ Берово, останува посветена на континуирана едукација, практична обука и соработка со институциите, со цел зголемување на безбедноста на граѓаните.