Градоначалникот на Општина Берово, Петар Ружински, денеска, во просториите на локалната самоуправа, оствари прием, на учесниците и нивните ментори, кои неодамна го претставуваа Берово, на „46 МАKИНОВА“ и „ 23 ЕКОНОВА“, што се одржаа во средното училиште „Киро Спанџов – Брко“ во Кавадарци, во организација на Народна техника на Македонија и СПАТУМ.
Градоначалникот Ружински им го честита постигнатиот успех на младите иноватори, изразувајќи гордост за нивниот ангажман и креативност. Тој посочи дека нивниот труд е потврда за квалитетната работа, учење и поддршката на нивните ментори, упатувајќи им честитки и желби за постигнување на уште поголеми успеси во иднина.
За време на приемот, учениците имаа можност да ги споделат своите искуства од натпреварите, да зборуваат за проектите што ги развивале и за предизвиците и мотивацијата кои ги воделе во процесот на иновација.
„МАКИНОВА“ и „ЕКОНОВА“ се манифестации со долгогодишна традиција, кои ги обединуваат учениците од земјата и регионот преку креирање и промовирање иновативни решенија што го олеснуваат секојдневието, работните процеси и остварувањето на различни општествени цели.
